SAJARAH KABUDAYAN PENCA

Nu mawi ieu buku dingaranan sajarah kabudayan penca teh, dumeh nu bade dicarioskeunana asal muasalna penca, malak mandar jadi panghudang kanu heuteu acan uninga (teu acan resep) kana ieu kabudayan; atuh kanggo anu parantos uninga etang-etang ngawangsulan bae, kanggo ngiatkeun maksad ngamajengkeun kabinangkitan karuhun Sunda, supados ulah dugi ka pareum di tengah jalan.

Bawi raos nu ngadamel ieu pedaran, ti kapungkur tug dugi ka kiwari teu acan aya ahli penca nu kersa mintonkeun buah manahna, ngadamel buku pangeling-eling gelarna ieu kabinangkitan di tanah Sunda.

Sim kuring nu ngalaman jaman anu palinter tina perkawis penca di tanah Cianjur, sapertos Juragan Rd. H. Ibrahim di cikalong, Ama Sabandar di Sabandar (Cianjur), ngaraos katarik, hoyong mintonkeun ka umum, lalakonna eta ahli-ahli menca, malak mandar jadi panarik ka seuweu putu Sunda kana ngagungkeun kabinangkitanana.

Ngemutkeun umur parantos tunggang gunung (dugi ka waktos ieu teh + 80 taun), meungpeung rada jagjag keneh maksakeun ngeureuyeuh tina seueur anu marundut ti ditu ti dieu. Ku emutan, upami mung numutkeun wartos pawartos-wartos deui mah, tangtos wuwuh lami wuwuh nebihan tina hartos anu saleresna sareng moal patos sakumaha nyebarna ka umum.

Kalih perkawis upami sim kuring parantos teu aya mah, teu acan tangtos aya anu kersa ngempelkeun kieu, jalaran saperkawis rerencangan anu kantos ngalaman sagulung sagalang dina waktos jumeneng para ahli menca, ayeuna parantos pupus, kalih perkawis teu acan kantenan aya nu kersa ngadamelna, jadi tangtos putra putra Sunda bakal poekeun.

Tadi di luhur parantos kapihatur, reh ieu dadaran teh mung wungkul nyarioskeun asal muasalna sareng para ahlina tina urusan penca bae, jadi sanes bade mintonkeun kumaha prak-prakanana, margi dina leresan eta mah moal katepi ku tulis, teu tiasa digambarkeun ku lisan, anging kedah ku rasa ku anjeun; dupi dongkapna rasa tea nya kedah ku biasa, cindekna kedah diajar sareng prakna, supados langkung sampurna.

Sateu acanna medar kaayaan sarupi-rupi penca, ayeuna bade dicarioskeun sarupi-rupi ameng anu jisim kuring terang, sapertos:

1.       Ameng Cimande;

2.       Ameng Sera;

3.       Ameng Betawi;

4.       Ameng Cikalong;

5.       Ameng Sabandar, jst.

Ieu teh ameng anu aya di tanah Sunda. Dupi ameng anu aya di tempat sanes sapertos :

1.       Ameng Padang (Penca Minangkabau);

2.       Ameng Kuntaw;

3.       Ameng Jujitsu;

4.       Ameng Boksen

5.       Ameng Worstelen (Gulat).

Tah eta anu disebatan bieu upami digulungkeun sadayana samaksad, satujuan, cindekna gumulung dina hiji karep anu sami, nya eta sami-sami niat ngajaga diri, beh dituna sami-sami hayang meunang, pada ngudag kaunggulan. Eta margina nu mawi kaseuseueuranana anu diajar ameng anu teu leres miarana, sok kaancikan ku rasa adigung, kagungan angkeuhan alus ieu batan itu, bisa aing batan batur. Padahal sadayana ameng oge heunteu aya anu langkung sae atanapi awon, estu lumrah bae, awon soteh kanggo anu masih bodo, da kanggo anu parantos pinter mah, tetep saena, teu gumantung kana ameng itu ameng ieu, saha-saha anu kawon nawiskeun yen bodo keneh.

Katangtosanana ameng tea, kenging dibagi 3 bagian, nya eta: 1. Saluhureun, 2. Pantar, 3. Sahandapeun. Eta patokan kedah jadi poko kanggo sadayana anu parantos iasa, kitu deui anu nuju diajar.

Upami diaben sareng saluhureun tangtos kawon, sareng pantar tangtos gedeg, saha-saha anu maksa hayang meunang sareng pantar, tangtos eta anu tigubrag. Upami diaben sareng sahandapeun tangtos salamina kenging.

Menggah kasaeanana ameng tea aya rupi-rupi, nya eta:

1.       Kanggo kalangenan, kanggo panghegar-hegar manah, nyingkirkeun galih nu rungsing, geuning aya babasan menggah anu parantos resep kana ameng mah upami ngadangu kendang teh menggah nyorodcod sampean. Eta teh teu aya sanes lintang katarik, manah rasa parantos gumulung sareng sora kendang.

2.       Kanggo gerak badan (sport) anu memang ku sadayana anu ngartos pada diarageungkeun, geusan ngudag kasehatan salira.

3.       Diajar rikat sareng rancingas dina ngalakukeun (mayunan) salah sawios perkawis.

4.       Geusan ngajaga diri (salira ku anjeun atanapi anu jadi tanggelanana) dina waktosna mayunan bahla anu teu disangka-sangka bakal tumiba.

5.       Jabi ti eta seueur deui upami ku urang dihaja dikotektak tina kasaenana ameng tadi.

Menggah anu diajar ameng tea supados langkung enggal nyerepna, kedah kagungan cita-cita anu medal tina rasana ku anjeun, terasna getol sareng wekel. Cita-cita anu diajar ameng biasana taya sanes lintang ti dibinasa atanapi ngabinasa, upami: jol paneunggeul ti dieu kieu nyambutna, di cepeng kitu, kitu mukana, gerakna kitu, kitu ngudagna, atanapi ngabinasana, sing dugi ka musuh (lawan) cilaka. Cindekna teu aya hiji maksud anu hayang ngangeunahkeun ka batur (musuh), nanging salamina milari jalan supados musuh teu tiasa walakaya atanapi dibinasa. Tah eta cita-cita anu sarupi kitu menggah ku jalmi anu BOLOSTRONG manah salancar mah, terasna dianggo ADIGUNG ieu aing bisa kieu bisa kitu, padahal eta teh dina buktina mah sok rajeun sulaya ti nu dimaksad, margi tadi oge parantos dicarioskeun yen teu aya anu leuwih tea, gumantung kana kapinteranana sareng kacakepanana bae. Kitu deui dina leresan kapinteran ameng mah sasat teu kantenan ukuranana paripaos MANUSA MAH TEU AYA ELMU PANUTUPNA, kedah bae aya saluhureunana, sanaos sareng pada jelema deui oge.

Kadua gaduh raos parantos pinter, ieu aing geus cukup, teu kudu diajar deui, terus ngajar batur (ngaguruan).

Ku margi parantos gaduh raos bisa tea, ana kadeseh ku batur, sanes ngemutkeun pangarti handap keneh, anggur sek ambek, balukarna:

1.       Matak pasea, tampolana gelut silih bacok;

2.       Ngahina kana pencana, pajar penca goreng, keur naon diajar penca kitu, teu matak pikaresepeun.

3.       Nyebarna nu awon wungkul, nu saena mah teu acan katepi, nya balukarna tambih ngirangan, tungtungna teu kaditu-teu kadieu.

4.       Bosenan.

Ku margi eta mugi ieu pedaran jadi EUNTEUNG ka sugri anu resep DIAJAR AMENG.

Ayeuna mangga urang papay runtuyanana hiji-hiji.

1.       CIMANDE

Ameng Cimande tea, nyaeta anu jadi poko kabinangkitan ameng anu pangpayunna gelar di tanah Sunda, sarta parantos kakoncara ti jaman beh ditu keneh. Dupi anu kagungan anggitan wallohu’alam saha mung ngawitan tembong ka umum nyaeta ti jaman EMBAH KAHiR, malah nya anjeunna pisan anu ngawitan nyebarkeun ka sakuliah tanah Pasundan oge.

Saha ari Embah Kahir teh?

EMBAH KAHIR tea dibabarkeunana dugi ka ageungna oge dikampung jeung desa Kamurang onderdistrict Mande, district Cikalong Kulon, Kabupaten Cianjur,

Nalika anjeunna sumedeng buta tulang buta daging, ngajarkeun ameng di kabupaten Cianjur, sabagian ageung ka para priyayi bae, jadi nu sanes mah langka anu uningaeun.

Waktos jaman Kanjeng Dalem Wiratanudatar IV (di Cianjur katelah Kanjeng Dalem Sabiroedin, Embah Kahir sok ngajar ka prajurit sareng priyantun, malah kantos diabenkeun sareng Sengke di alun-alun Cianjur, nya Sengke bobor karahayuanana malah dina buku Pangeran Kornel, karangan Raden Memed Sastrahadiprawira, kaluaran Bale Pustaka oge kaunggel.

Teu kantos lami ti harita, di Karawang di Pengewelan aya rebut, sadayana bngs sengke ngalawan ka Pamarentah, teras dirugrug ku urang Cianjur sareng ti sanes tempat dugi ka beresna, malah dongkap ka ayeuna di Karawang aya kampong Babakan Cianjur, nya eta tilas ngababakanana urang Cianjur wktos ngayonan rebut sareng Sengke tea (perang Makaw ceuk urang Karawang mah) teras deui numpes Bagus Rangin, kapala barandal.

Dina waktos harita teu aya deui ameng lian ti amengan Embah Kahir wungkul (CImande tea).

Lami ti lami Embah KAhir ngalih ka Cimande, Kabupaten Bogor. Di Cimandena teras ngajarkeun ameng dongkap ka ayeuna turun tumurun, dugi ka meh sakuliah tanah PAsundan ka suklakna ka siklukna parantos teu aya anu bireuk kana penca Cimande, sarta sabagian ageung seueur nu parantos tiasa. Dina aya hahajatan (Kaul) seueur anu ngahaja disambung-sambungkeun sareng pada baturna, sarta seuseueurna beres roes heunteu ngajantenkeun kaributan naon-naon.

Kabehdieunakeun saparantos seueur rundayanana (rupi-rupi ameng) dina waktosna disambungkeun tea sok sering ngajadikeun kaributan, lantaran pada-pada haying unggul tea embung disebat awon.

Eta gening bet aya ameng anu sanes di tanah PAsundan. Sapertos Batawi, Ciwaringin, Sera, Depok, Cigondewa, jst, eta mah gumantung kana tempatna nu jadi guruna, sapertos; guruna calik di Ciwaringin, jadi ameng Ciwaringin, guruna calik di Nyengseret, jadi ameng Nyengseret jst, nanging asalna mah nya Cimande Cimande keneh bae, iwal ti Cikalong sareng Sabandar.

Aya ameng anu bade abulu sareng Cimande, sabulu sareng Cikalong, disebat Cimande sanes, disebat Cikalong sanes, nya eta Penca Cikaret. Eta Penca CIkaret upami ditinggali saliwat jiga Cimande, nanging dina dekna pasambung sanes Cimande, aya gerak sareng rasa jiga Penca Cikalong.

NAon atuh margina nu mawi aya dua bulu?

Nalika Ajengan Cikaret (Sukabumi) jumeneng, anjeunna diajar Cimande heula, lajeng diajar Cikalong, Jadi Cimande aya, Cikalong aya.

Numutkerun kabiasaaan upami nyandak salah sahiji ameng anu dipikaresep, ameng anu sanesna sok teu dianggo deui, pindah ka anu keur dipikaresep tea, nanging ari dugi ka hilap pisan mah heunteu, sok aya bae paham-paham anu tiheula anus ok digunakeun, nya kabuktian dina ameng CIkaret tea. Ku iasana Ajengan Cikaret anu ngawulangna nepi ka jadi aya 2 bulu, nya eta bulu Cimande sareng bulu Cikalong.

Eta ameng Cikaret tea teras nyebar ka putra putuna Ajengan Cikaret sareng ka murid-muridna.

Nyambung……